दैनिक, हिंदू जागर | रोशन ठाकुर, वर्धा

सेलू / वर्धा : सेलू शहरातील बीएसएनएल कार्यालय परिसरात मोठ्या प्रमाणात झाडांची तोड करण्यात आल्याचा गंभीर प्रकार समोर आला असून, या वृक्षतोडीने प्रशासनाच्या कार्यपद्धतीवरच प्रश्नचिन्ह उभे केले आहे. बीएसएनएल कार्यालयाच्या आवारात झाडांवर कुऱ्हाड चालत असताना संबंधित अधिकाऱ्यांना याची माहितीच नव्हती, असा दावा करण्यात येत असल्याने नागरिकांमध्ये संतापाची लाट निर्माण झाली आहे.

झाडे तोडली जात असताना अधिकारी नेमके कुठे होते?

बीएसएनएल कार्यालय परिसरात मोठ्या प्रमाणात झाडांची तोड झाली. मात्र, या वृक्षतोडीसंदर्भात कार्यालयातील कर्मचाऱ्यांकडे विचारणा केली असता, झाडे कोणी तोडली याची आम्हाला माहिती नाही, अशी भूमिका घेतल्याचे सांगण्यात येत आहे. कार्यालयाच्या हद्दीत एवढ्या मोठ्या प्रमाणात वृक्षतोड होत असताना प्रशासनाला त्याची माहिती नसणे ही बाबच अनेक प्रश्नांना जन्म देणारी ठरत आहे.

परवानगी होती की सरळ कुऱ्हाड चालवली?

या वृक्षतोडीसाठी संबंधित विभागाची अधिकृत परवानगी घेण्यात आली होती का? परवानगी घेतली असेल तर तिची कागदपत्रे कुठे आहेत? किती झाडे तोडण्याची मंजुरी होती आणि प्रत्यक्षात किती झाडांवर कुऱ्हाड चालवण्यात आली? या सर्व बाबींची अधिकृत चौकशी होणे आवश्यक आहे.

विशेष म्हणजे, तोडलेले लाकूड नेमके कुठे नेण्यात आले? त्याची नोंद कोठे आहे? लाकूड वाहतुकीसाठी आवश्यक परवानग्या घेण्यात आल्या होत्या का? याचाही तपास होणे गरजेचे आहे.

वनविभागाला माहिती देऊनही कारवाई का नाही?

या प्रकरणाची माहिती वनविभागीय अधिकारी मीनल तुरखडे यांना देण्यात आल्याचे सांगण्यात येत आहे. मात्र, तक्रार आणि माहिती मिळूनही तातडीने ठोस कारवाई झाल्याचे दिसून न आल्याने वनविभागाच्या भूमिकेवरही प्रश्न उपस्थित होत आहेत.

दरम्यान, वनविभागातील अधिकारी गावंडे यांच्याशी संपर्क साधण्यात आल्याचे सांगण्यात येत आहे. ठेकेदाराला फोन करून प्रकरण वाढवू नये, अशा स्वरूपाचा सल्ला दिल्याचा आरोप करण्यात आला आहे. मात्र, या आरोपांची स्वतंत्रपणे अधिकृत पुष्टी झालेली नसून, या संपूर्ण बाबीची वरिष्ठ अधिकाऱ्यांकडून निष्पक्ष चौकशी होणे आवश्यक आहे.

बीएसएनएल म्हणते माहिती नाही; मग झाडे तोडली कुणी?

एकीकडे बीएसएनएल प्रशासनाकडून वृक्षतोडीबाबत अनभिज्ञता व्यक्त केली जात असल्याचा दावा आहे, तर दुसरीकडे वनविभागाला माहिती देऊनही तत्काळ कारवाई झाली नसल्याचे सांगितले जात आहे. त्यामुळे आता सर्वात मोठा प्रश्न असा निर्माण झाला आहे की –

झाडे तोडली कुणी? परवानगी दिली कुणी? झाडे तोडण्याचे आदेश कुणाचे? तोडलेले लाकूड कुठे गेले? लाकडाची नोंद झाली का? आणि माहिती मिळूनही कारवाईला विलंब का? या प्रश्नांची उत्तरे आता सेलूकरांना हवी आहेत.

वरिष्ठ अधिकाऱ्यांनी तातडीने चौकशी करावी

या प्रकरणात बीएसएनएल प्रशासन आणि वनविभागाने एकमेकांकडे बोट दाखवण्याऐवजी वस्तुस्थिती जनतेसमोर मांडणे गरजेचे आहे. वृक्षतोडीची अधिकृत परवानगी, तोडण्यात आलेल्या झाडांची संख्या, झाडांचा प्रकार, लाकडाचे प्रमाण, लाकडाची विल्हेवाट, वाहतूक, संबंधित ठेकेदार तसेच अधिकाऱ्यांची भूमिका याची सखोल चौकशी करण्यात यावी.

चौकशीत नियमबाह्य वृक्षतोड झाल्याचे निष्पन्न झाल्यास संबंधितांवर कायद्यानुसार कठोर कारवाई करण्यात यावी, अशी मागणी नागरिकांकडून होत आहे.

कुऱ्हाड झाडांवर चालली; आता चौकशीची कुऱ्हाड दोषींवर चालणार का?

सेलूतील या प्रकरणाने केवळ झाडतोडीचा मुद्दा उभा केला नसून, सरकारी कार्यालयाच्या आवारातील मालमत्ता आणि वृक्षसंपत्तीच्या सुरक्षेची जबाबदारी नेमकी कोणाची? हा मूलभूत प्रश्नही उपस्थित केला आहे.

आता वरिष्ठ प्रशासनाने या प्रकरणाची दखल घेऊन ‘झाडतोडीचा नेमका खेळ’ कोणाचा होता, याचा पर्दाफाश करावा, अशी मागणी जोर धरत आहे. बीएसएनएल प्रशासन आणि वनविभागाने या प्रकरणावर अधिकृत स्पष्टीकरण देऊन जनतेच्या प्रश्नांना उत्तरे द्यावीत, अशी अपेक्षा व्यक्त होत आहे.