भाकर अर्धी, स्वप्न मात्र पूर्ण – घरकाम करणाऱ्या आईच्या कष्टांना मुलीने दिलं यशाचं सोनं; वर्ध्याची मान अभिमानाने उंचावली
दैनिक, हिंदू जागर
रोशन ठाकुर, वर्धा
वर्धा : आयुष्यात परिस्थिती कितीही कठीण असो, पण मनात जिद्द आणि डोळ्यांत स्वप्न असेल तर यश अटळ असते याचं जिवंत उदाहरण म्हणजे वर्धा शहरलगतच्या आर्वी नाका परिसरातील गजानन नगर येथील कु. समीक्षा गिरी अत्यंत हलाखीच्या परिस्थितीत वाढलेल्या या मुलीने आपल्या कष्ट, चिकाटी आणि न डगमगणाऱ्या आत्मविश्वासाच्या बळावर मुंबई पोलीस दलात दमदार निवड मिळवून संपूर्ण वर्धा जिल्ह्याची मान उंचावली आहे.
कु. समीक्षा गिरीचा प्रवास हा केवळ एका निवडीचा नाही, तर संघर्षातून उभ्या राहिलेल्या एका स्वप्नाचा आहे. तिच्या कुटुंबाची आर्थिक परिस्थिती अत्यंत नाजूक आई लोकांच्या घरी जाऊन घरकाम करून संसार चालवत होती, तर वडील पेंटिंगच्या कामातून रोजीरोटी कमवत होते. तीन मुली, एक मुलगा आणि आई-वडील असा मोठा परिवार आणि रोजच्या जगण्यासाठीही धडपड.
घरात अनेकदा अशी वेळ यायची की मुलीच्या शिक्षणासाठी आवश्यक पुस्तकं, कपडे किंवा अगदी लहानसहान गरजाही पूर्ण करता येत नव्हत्या. पण आईच्या मनात एकच हट्ट होता माझी मुलगी शिकणार, उंच भरारी घेणार त्या हट्टासाठी आईने स्वतःच्या थकव्याला हरवून दिवस-रात्र कष्ट केले.
आईच्या या त्यागाची जाणीव ठेवत कु. समीक्षा गिरीनेही प्रत्येक क्षण सोन्यासारखा वापरला. अभ्यासात सातत्य ठेवत, मैदानावर घाम गाळत, शारीरिक आणि मानसिक दोन्ही तयारी करत तिने स्वतःला घडवलं. अपयशाच्या छायेतूनही न खचता ती पुन्हा उभी राहिली आणि आज तिसऱ्यांदा मुंबई पोलीस दलात निवड होऊन तिने यशावर आपली मोहोर उमटवली.
समीक्षा स्वभावाने अत्यंत साधी, निरागस आणि शांत आहे. पण तिच्या डोळ्यांत एकच ध्येय होतं आई-वडिलांच्या कष्टांचं सोनं करायचं आणि आज तीच जिद्द तिच्या यशात झळकताना दिसते. तिच्या या यशामुळे केवळ तिच्या कुटुंबाचा नव्हे, तर संपूर्ण गजानन नगर आणि वर्धा शहराचा अभिमान उंचावला आहे.
या यशानंतर कु. समीक्षा गिरीने अत्यंत नम्रपणे आपल्या आई-वडील, शिक्षक, मार्गदर्शक, मित्रपरिवार आणि प्रत्येक त्या व्यक्तीचे आभार मानले ज्यांनी तिच्या प्रवासात साथ दिली. हे यश माझं नाही, माझ्या आईच्या घामाचं आणि वडिलांच्या मेहनतीचं आहे, असे भावनिक शब्द तिने व्यक्त केले.
आजच्या स्पर्धेच्या युगात अनेक तरुण-तरुणी छोट्या अडचणींनी खचतात पण कु. समीक्षा गिरीने दाखवून दिलं की परिस्थिती कितीही कठीण असली तरी जिद्द, मेहनत आणि आत्मविश्वास असेल तर यश तुमच्या पायाशी नतमस्तक होते.
गजानन नगरातील ही मुलगी आज हजारो युवक-युवतींसाठी प्रेरणादायी दीपस्तंभ ठरली आहे. तिचा संघर्ष, तिची मेहनत आणि तिचं यश हे समाजासाठी एक संदेश आहे स्वप्नं मोठी ठेवा आणि त्यासाठी लढण्याची तयारी ठेवा.
अशा या जिद्दी, कर्तबगार आणि ध्येयवेड्या कु. समीक्षा गिरीला दैनिक, हिंदू जागर तर्फे मानाचा मुजरा. तिच्या यशाची ही कहाणी अनेकांच्या आयुष्यात नवी उमेद निर्माण करो आणि अशाच संघर्षातून यशाची फुले उमलत राहोत, हीच मनापासून अपेक्षा.
