सिंदी (रेल्वे) पोलिसांच्या नाकावर टिचून आशिष डंभारेचा वाळू उपसा

दैनिक, हिंदू जागर

प्रतिनिधी : दिनेश घोडमारे

सिंदी (रेल्वे) : शासकीय नियमांची पायमल्ली आणि प्रशासनाचा धाक उरला नसल्याचे चित्र सिंदी परिसरात पाहायला मिळत आहे. येथील कुख्यात रेतीमाफिया आशिष डंभारे हा वणा नदीपात्रातील हत्तीगोटा रेती घाटातून खुलेआम वाळूचे अवैध उत्खनन व वाहतूक करत आहे. विशेष म्हणजे, स्थानिक पोलिसांच्या नाकावर टिचून हा गोरखधंदा सुरू असतानाही कारवाई होत नसल्याने, डंभारेला काही भ्रष्ट पोलिसांचा वरदहस्त असल्याची चर्चा आता जनमानसात रंगू लागली आहे.

मिळालेल्या माहितीनुसार, आशिष डंभारे याने रेती चोरीसाठी एक मजबूत नेटवर्क तयार केले आहे. उत्खनन सुरू असताना सिंदी ते हत्तीगोटा मार्गावर त्याचे साथीदार जागोजागी उभे राहून ‘वॉच’ ठेवतात. प्रशासकीय हालचाल किंवा संशयास्पद वाहन दिसताच मोबाईलद्वारे एकमेकांना सूचना देऊन रेतीची वाहने गायब केली जातात. एखाद्या चित्रपटात शोभावं असं हे ‘नेटवर्क’ पोलिसांच्या डोळ्यासमोर कार्यरत असताना पोलीस ढिम्म का? असा सवाल उपस्थित होत आहे.

मागील कित्येक वर्षांपासून डंभारे हा रेतीची तस्करी करत आहे. परिसरातील नागरिकांनी अनेकदा याकडे लक्ष वेधले, मात्र ‘अर्थपूर्ण’ संबंधांमुळे कारवाईची फाईल दाबण्यात येत असल्याचा संशय व्यक्त होत आहे. वणा नदीचे पात्र अवैध उत्खननामुळे धोक्यात आले असून, पर्यावरणाची मोठी हानी होत आहे. जर सर्वसामान्य माणसाने एखादी चूक केली तर कायदा तत्परतेने काम करतो, मग वर्षानुवर्षे शासनाचा महसूल बुडवणाऱ्या डंभारेवर सिंदी पोलीस मेहेरबान का?

 आता या माफियाराजला लगाम घालण्यासाठी तहसीलदार शकुंतला पराजे आणि ठाणेदार नरेंद्र निस्वादे यांनीच पुढाकार घेण्याची गरज आहे. या प्रकरणाची सखोल चौकशी करून, माफिया आशिष डंभारेच्या मुसक्या आवळल्या जातील की भ्रष्ट पोलीस कर्मचाऱ्यांच्या आशीर्वादाने हा खेळ असाच सुरू राहील, याकडे संपूर्ण तालुक्याचे लक्ष लागले आहे.