दैनिक, हिंदू जागर
प्रतिनिधी : दिनेश घोडमारे
सिंदी (रेल्वे) : जिद्द आणि कष्टाच्या जोरावर अशक्य वाटणारी गोष्टही साध्य करता येते, हे सिंदी येथील अक्षय सुधाकर वाघमारे याने दाखवून दिले आहे. अत्यंत कठीण मानली जाणारी ‘सीए’ ही परीक्षा उत्तीर्ण होऊन अक्षयने आपल्या वडिलांचे स्वप्न साकार केले असून संपूर्ण परिसरात त्याचे कौतुक होत आहे.
नेहरू विद्यालय, सिंदी येथून शालेय शिक्षण पूर्ण करणाऱ्या अक्षयने १० वी मध्ये ९४% गुण मिळवून आपल्या गुणवत्तेची चुणूक दाखवली होती. डॉक्टर किंवा इंजिनिअर होण्याऐवजी त्याने आव्हानात्मक अशा ‘सीए’ क्षेत्राची निवड केली. सीए परीक्षेचे स्वरूप अत्यंत कठीण असते. यात ५०% गुणांची अनिवार्यता आणि एक विषय राहिल्यास संपूर्ण ग्रुप पुन्हा देण्याच्या अटीमुळे अनेकजण अर्ध्यावरच जिद्द सोडून देतात. अक्षयच्या बाबतीतही शेवटच्या टप्प्यावर दोन वेळा अपयश आले. मात्र, त्याने खचून न जाता मधल्या काळात एम.बी.ए. पूर्ण केले. त्याच्या कौशल्यामुळे त्याला हैदराबाद आणि त्यानंतर बंगलोर येथे २२ लाख रुपयांच्या वार्षिक पॅकेजची नोकरी मिळाली.
बंगलोर येथे मोठ्या पॅकेजवर नोकरी करत असताना अभ्यासासाठी पुरेसा वेळ मिळत नव्हता. तरीही अक्षयने आपली जिद्द सोडली नाही. व्यावसायिक जबाबदाऱ्या आणि अभ्यासाचा ताळमेळ बसवत त्याने अखेर ‘चार्टर्ड अकाउंटंट’ ही पदवी प्राप्त केली. ओबीसी समाजातील मुले अनेकदा इंजिनिअरिंग किंवा इतर क्षेत्रांकडे वळतात, कारण सीए होण्यासाठी लागणारा वेळ आणि कठीण परीक्षांची त्यांना भीती वाटते. पण कोणत्याही अर्थव्यवस्थेची नाडी म्हणजे सीए असतो. ऑडिटची प्रत्येक विभागात असलेली गरज पाहता या क्षेत्राला मोठी मागणी आहे, असे मत अक्षयच्या वडिलांनी व्यक्त केले. अक्षयचे वडील सुधाकर वाघमारे यांचे स्वतःचे सीए होण्याचे स्वप्न काही अडचणींमुळे अपूर्ण राहिले होते. मात्र, आज त्यांची मुलगी डॉक्टर आणि मुलगा सीए झाल्याने, मुलांच्या माध्यमातून आपले स्वप्न पूर्ण झाल्याचा सार्थ अभिमान त्यांनी व्यक्त केला आहे. अक्षयच्या या यशाने सिंदी शहराच्या शिरपेचात मानाचा तुरा रोवला असून, ग्रामीण भागातील विद्यार्थ्यांसाठी तो एक प्रेरणास्थान ठरला आहे.
