गांजा माफियांचा खेळ खल्लास – स्थानिक गुन्हे शाखेची धडाकेबाज कारवाई; समुद्रपुरात २ आरोपी जेरबंद, १.३४ लाखांचा मुद्देमाल जप्त

                                    दैनिक, हिंदू जागर

वर्धा : जिल्ह्यात अंमली पदार्थांच्या अवैध धंद्यांविरोधात कठोर भूमिका घेत वर्धा पोलिसांनी आता थेट मैदानात उतरून कारवाईचा वेग वाढवला आहे. त्याचाच भाग म्हणून स्थानिक गुन्हे शाखेच्या पथकाने समुद्रपूर तालुक्यात धडाकेबाज कारवाई करत गांजा विक्री करणाऱ्या दोघांना जेरबंद केले, तर तब्बल १ लाख ३४ हजार ७७५ रुपयांचा मुद्देमाल जप्त केला आहे.

मिळालेल्या माहितीनुसार, १८ एप्रिल रोजी हिंगणघाट उपविभागात गस्त घालत असताना पोलिसांना गुप्त माहिती मिळाली की, समुद्रपूर पोलीस ठाणे हद्दीतील मौजा कोरी येथे एक व्यक्ती गांजाची विक्री करत आहे. या माहितीच्या आधारे स्थानिक गुन्हे शाखेच्या पथकाने तात्काळ सापळा रचत छापा टाकला. या कारवाईदरम्यान कमलाकर चिंतामन वावधणे हा आरोपी गांजाची विक्री करताना रंगेहात पकडण्यात आला.

पोलिसांनी घटनास्थळी पंचनामा करून आरोपीच्या ताब्यातून सुमारे २ किलो १५१ ग्रॅम गांजा, गांजाच्या वाहतुकीसाठी वापरण्यात आलेली पॅशन प्रो मोटारसायकल क्र. एमएच ३२ एएम १६२७ तसेच मोबाईल फोन असा एकूण १ लाख ३४ हजार ७७५ रुपयांचा मुद्देमाल जप्त केला.

तपासादरम्यान या प्रकरणात शेख अलीम शेख रमजान रा. आदर्श नगर, नागपूर याने गांजाचा पुरवठा केल्याचे उघड झाले. त्यानुसार दोन्ही आरोपींविरुद्ध समुद्रपूर पोलीस ठाण्यात एनडीपीएस कायद्यान्वये गुन्हा नोंद करण्यात आला आहे.

ही कारवाई जिल्हा पोलीस अधीक्षक सौरभ कुमार अग्रवाल व अपर पोलीस अधीक्षक सदाशिव वाघमारे यांच्या मार्गदर्शनाखाली, स्थानिक गुन्हे शाखेचे पोलीस निरीक्षक विनोद चौधरी यांच्या नेतृत्वात पथकाने यशस्वीपणे पार पाडली.

जिल्ह्यात अंमली पदार्थांच्या वाढत्या विळख्यातून तरुणाईला वाचवण्यासाठी पोलिसांनी उचललेले हे पाऊल महत्त्वाचे मानले जात असून, अशा धडक कारवायांमुळे अवैध धंदे करणाऱ्यांमध्ये मोठी खळबळ उडाली आहे.